KARNUKAN 'YAN SANDA SUNFI TALAKA AMFANI!

Ci gaban ko wace kasa da kwanciyar hankali ya danganta ne kan irin tsaron da take dashi. Domin kuwa tsaro na daya daga cikin abubuwan dake kawo ci gaba a ko wace kasa. Duk kasar da babu cikakken tsaro a cikinta, la shakka wannan kasa na cikin fargaba da karuwar barayi da sauran masu aikata miyagun ayyuka.
Hakika hubbasar gwamnatin Nijeriya na sayo karnuka don baiwa rundunar yansanda domin kara inganta harkar tsaro abin a yabane matuka gaya. Domin kuwa hakan zai dada taimakawa jami’an tsaron durkushe ko wani irin gungu na barayi da kuma bata gari. Amma fa akwai alamar tambaya a cikin wannan lamarin. Domin kuwa kudin da gwamnatin tayi ikirarin cewa za’a sayo ko wani kare guda daya ya wuce daukar mai hankali, sannan ga kudin yin masa hidima a kowani ranar Allah ta’ala. Baya ga naira miliyan biyu a kan ko wani kare da za’a sayo, akwai kuma kudin ciyar dashi a kowani rana naira kusan dubu biyu koma fiye da haka. Kenan, kudin abincin ko wani kare a wata ya fi albashin wani dan sanda kenan. Lallai kam Allah ya kawomu wani zamani da a nijeriya dabba yafi dan adam daraja da kuma amfani a wajen gwamnatin kasa.
Alal hakika akwai bukatar gwamnatin nijeriya ta sake lale da kuma duba wannan kudi da aka ware don sayo karnukan nan wadanda akafi sani da POLICE DOG don kaucewa yin almubazzaranci da dukiyar jama’a. Domin kuwa hakan zaizama abin tir da kuma Allah wadai, ganin yadda talaka ke cikin kunci hali, tsadar rayuwa ga rashin ci sau uku a rana amma ace wai an dauki kudin talakawa wuri na gugar wuri har naira miliyan biyu don sayo ko wani kare guda daya.
Bawai wannan na nufin hubbasan da gwamnati keyi na sayo karnuka don inganta harkan tsaro bashi da kyau ba ne, a’a makudan kudin da akeson kashewa ne don sayo karnukan sukayi yawa, musamman ma ganin cewa akwai hanyoyi da yawa da za’a iya inganta harkan tsaro a kasarnana. Alal misali, akwai bukatar sayowa jami’an tsaro kayan aiki na zamani don samun yin gogayya da takwarorinsu na kasashen ketare dakuma samun damar yin ayyukansu ba tare da wani fargaba ba. Domin kuwa sama da kashi tamanin cikin dari na kayan aikinsu tsoffini kuma basu da inganci. Har ila yau, a kawi bukatar turasu yin kwasa-kwasai don kara gogewa da sanin makaman aiki (koda yake gwamnati ta soke zuwa kasahen waje don yin kwas-kwasai sakamakon faduwar darajar man fetur a kasuwar duniya) da dai sauransu. Don haka sayo karnuka ba tare daba jami’ai horon daya kamata ba tamkar yin aikin banzane domin kuwa kwalliya bazata biya kudin sabulu ba.
Waima abin tambaya shine, shin ya dace a kashe wadannan makudan kudin don sayo karnuka kawai? Zai yi kyau sosai idan aka sake duba kasafin da akayi don sayo wadannan karnuka,kuma gwamnati ta rika sara tana duban bakin gatari ba wai a fake da guzma a harbi karsanaba. A gayawa talakawa gaskiyar abinda za’ayi da kudinsu bawai sayo karnuka ba.